هر بیر سؤزون بؤلمه‌جیک‌لرینی بیتیشیک، یاخین و آرالی یازماق‌لا آیری آیری آنلام‌لاری ایفاده ائده بیله‌ریک.

بیتیشیک یازماق: “چی/چو” أکی اؤزوندن قاباقکی سؤزه بیتیشیک یازیلیر:

ــ آتچی (آت+چی)

یاخین یازماق: “لر” أکی نه اؤزندن قاباقکی سؤزدن آرالی یازیلیر، نه ده اونا بیتیشیر، بلکه یاخین یازیلیر:

دییشیکلیک‌لر (دییشیکلیک+لر)

آرالی یازماق: آردیجیل گلن ایکی سؤز بیربیریله ایله سیخ ایلگیده اولدوقلارینا باخمایاراق بیر فاصیله ایله یازیلیرلار:

ــ اوجا داغ

“کی” باغلاییجی‌سی اؤزوندن قاباقکی سؤزه بیتیشدیکده بللی بیر آنلامی ایفاده ائدیر، آرالی یازیلدیقدا ایسه باشقا آنلامی. اؤرنک:

– ایندی کی، توْی قوْرتاردی، گل گئده‌ک [حال که جشن پایان رفت، بیا برویم].

– ایندیکی توْی قورتاردی، گل گئده‌ک [جشن فعلی تمام شد، بیا برویم].

گؤروندویو کیمی بیرینجی “کی” سؤوزونو آرالی یازمیشیق، ایکینجیسینی ایسه بیتیشیک.